Ég hef þyngst

eftir tvær fermingarveislur á tveimur dögum. Usssss....... það ætti að banna þetta! Svo eiga tvíbbarnir afmæli í dag. Og því fær maður sjálfsagt eitthvað að éta þar í dag. 11 ára. Fyrir 11 árum vaknaði ég við það að pabbi minn sagði mér að tvíbbarnir væru fæddir. Það var töluvert fyrir áætlaðan fæðingardag, svo að ég staulaðist frammúr, úrill, og sagði hann vera að ljúga að mér. Hann þrætti fyrir það og ég labbaði um allt og kallaði á mömmu. Leitaði í þvottahúsinu og öllum herbergjunum og labbaði loks inn í stofu og gáði á bak við sófann. Í dag, tveim meðgöngum seinna, átta ég mig á því að það var kannski ekkert sérlega líklegt, að hún mamma mín, komin á steypirinn með tvíbura, færi að fela sig á bak við sófann í stofunni bara til þess eins að gera gott grill í Aðalheiði klukkan 7.30 að morgni til. "Hey Jói, ég fel mig á bak við sófann og þú lýgur að Allý að tvíbbarnir séu fæddir. Það er fyndið!!"