Fiskigleðin

Mjög skemmtileg helgi að baki. Skemmtilega helgin byrjaði eiginlega í matsalnum á Lansanum á fimmtudeginum þegar ég var að segja skiptinemunum sem voru á norðurleið yfir helgina að þá yrðu þeir eiginlega að koma við á Delvik, which is wery close from Akureyri. There is að great festival there, this weekend.
Skiptinemarnir urðu glaðir: Ahhh Festival. What kind of Festival?
Aðalheiður fiskiprangari: Uhhhhhh The Great FISH Festival.
Og þegar ég heyrði sjálfa mig segja: The great fish festival þá fór ég að hlæja og aumingja skiptinemarnir héldu að ég sé illkvittin sál sem beini útlendingum á falskar útihátíðir mér til skemmtunar. Allavega, ég veit ekki hvort þeir komu, enda voru 30.000 manns þarna og ekki víst að ég hefði séð þau hvort sem er.
Komið var við í Hörgá á leiðinni norður þar sem Doddi fór í Simms vöðlurnar og veiddi ekki neitt í þeim. Það gerðu Þórir og Snorri ekki heldur, svo vöðlunum verður ekki um kennt. Reyndar fékk ég stærsta fiskinn en það sá enginn nema Þórir og sú saga verður ekki sögð hér.
Fiskisúpukvöldið á föstudeginum var æði. Rölt hús úr húsi og borðaðar ýmsar fiskisúpur. Seríur í görðunum, sums staðar lifandi tónlist og allsstaðar góð stemning. Sátum í læknabústaðnum hans Snorra til 3 um nótt. Ef maður hefur langanir til þess að lenda í lífshættulegum aðstæðum í partýjum, svo sem fá cardiac arrest eða annað gott stöff, þá var þetta rétta partýið til þess. 12 læknar eða verðandi læknar. Þeir sem ekki voru læknar í þessu partý eru búnir að heyra svo mikið um nýju protocolana í endurlífgun að Beisi gæti framkvæmt hana blindandi. Löggan tók mig á bílnum um nóttina og lét mig blása. Ég fílaði það og sendi sponsornum sms: Löggan lét mig blása og ég fílaði það:)
Laugardagurinn. Maður fólksins lét sjá sig um daginn en var á vakt um kvöldið. Brunch um morguninn, fiskifjör um daginn, fótboltamót þar sem GoLightly (Huh! það er víst skrifað Golytely) fór á kostum og snilldar matarboð hjá Þóri og Huldu um kvöldið í nýju glæsivillunni. Keppt var í KUBB um nóttina, 8 stelpur á móti 7 strákum, og á tímabili vissi ég ekki hvernig í andskotanum ég gat hafa gifst Þóroddi, þeim auma svindlara og almennum KUBB lúða. Laganna verðir mættu, aftur, og báðu okkur um að hafa lægra í þessum leik. HUH!! Réttast hefði verið að strákarnir hefðu verið handteknir fyrir svindl en það fór ekki svo.
Farið í pottinn og þar var ég til 5 um nóttina. Ég held að ég hafi ekki komið heim úr partý klukkan 5 í fjögur ár. En þetta var sturlað gaman. Líf og fjör á Great Fish Festival.
P.s að loknum fundi. Ég tók eiginlega engar myndir. Ólöf, viltu senda mér þínar? ALLAR, líka þessar af þér!